Desde CCOO informamos de que, xunto co resto das organizacións sindicais asinantes, se procedeu á denuncia do XII Convenio colectivo estatal de centros de ensino privado de réxime xeral ou ensino regulado sen ningún nivel concertado nin subvencionado, dando así comezo ao proceso de negociación do XIII Convenio colectivo.
Unha vez coñecido o nomeamento de Ángeles Vázquez como nova conselleira de Política Social, a Secretaria Xeral de CCOO Ensino, Noelia Sánchez Vaamonde, solicitou formalmente unha reunión con ela para abordar as principais problemáticas que afectan os sectores de Menores, Discapacidade e Educación Infantil de 0 a 3 anos.
A marcha de Fabiola García a Madrid é unha boa ocasión para facer balance dun mandato marcado pola falta de diálogo, o desprezo á representación legal das persoas traballadoras e a ausencia de respostas ás reivindicacións dos sectores de Discapacidade, Menores e Educación Infantil 0-3.
O Goberno confirma a suba salarial do 4,5 % para o persoal empregado público en 2027. CCOO esixe a aprobación urxente dun real decreto lei que garanta a súa aplicación desde xaneiro e o cumprimento do resto dos compromisos pactados.
O sindicato dirixiuse ao ministro Óscar López para solicitar unha resposta expresa sobre o cumprimento do acordo entre Goberno e sindicatos respecto á suba salarial e outras materias
CCOO Ensino denunciamos que a Xunta presume de apoiar o ensino concertado mentres mantén bloqueadas as melloras salariais e laborais das súas profesionais. Esiximos que o financiamento público garanta condicións dignas e que a Administración deixe de confrontar as traballadoras dos distintos ámbitos educativos e sociais.
Desde CCOO Ensino facemos unha valoración moi positiva da xornada de folga de hoxe. As organizacións sindicais convocantes ciframos nun 65 % o seguimento do paro, mentres que máis de 2.500 persoas se mobilizaron en Compostela, a pesar das condicións meteorolóxicas adversas.
Tras a primeira reunión do Consello Escolar de Galicia no curso 2026-2027, reclamamos respostas para o persoal do ensino concertado e de apoio educativo, así como unha cobertura máis áxil das vacantes de inicio de curso.
Nas últimas dúas semanas, CCOO Ensino mantivo dúas reunións co grupo parlamentario do PSdeG para abordar a situación do ensino público non universitario, do Persoal de Apoio Educativo, do persoal do ensino privado e concertado e dos sectores socioeducativos.
As organizacións sindicais reclamamos ao conselleiro a convocatoria inmediata da Mesa Tripartita do Ensino Concertado e a apertura dun calendario real de negociación. Ante a falta de resposta da Consellería, anunciamos novas xornadas de folga os días 6 de outubro, 10 de novembro e 15 de decembro.