CCOO Enseñanza presenta o informe La FP en venta: cómo la privatización está robando el futuro de la juventud, no que alerta do avance da oferta privada na Formación Profesional (FP) e das crecentes desigualdades territoriais no acceso a unha FP pública e de calidade.
O informe constata que o forte crecemento do alumnado en FP non foi acompañado dunha expansión suficiente da rede pública. Como resultado, a oferta privada absorbe cada vez máis demanda e xa representa preto dun terzo do alumnado no Estado, superando o 40 % en comunidades como o País Vasco ou o 37 % na Comunidade de Madrid.
O sindicato denuncia que o acceso á FP depende cada vez máis do lugar onde se vive e da capacidade económica das familias. Nun contexto de precariedade laboral, baixos salarios e enormes dificultades para a emancipación, a FP converteuse nunha vía clave cara ao emprego xuvenil, pero a falta de planificación pública está transformándoa nun mercado educativo que selecciona por renda.
O documento pon de relevo que esta desigualdade se agrava nos territorios rurais e nas comunidades con maior presión de demanda, onde a escaseza de prazas públicas obriga a moitas persoas mozas a se desprazar, asumir custos elevados ou recorrer á FP privada —presencial ou a distancia— como única alternativa. Esta situación limita as oportunidades formativas e profesionais, e debilita o papel da FP como ferramenta de cohesión social e territorial.
CCOO advirte tamén do crecemento da FP a distancia como principal vía de expansión privada, especialmente en ciclos de alta demanda, así como do risco de precarización na FP Dual se non se garanten prácticas de calidade, titorización real e control público.
Ante este escenario, o sindicato reclama un plan de expansión da FP pública, máis investimento en infraestruturas, profesorado e orientación profesional, e un modelo de FP Dual con dereitos, vinculado ao emprego digno e estable.