A Federación de Enseñanza de CCOO (FECCOO) valora o reinicio das negociacións co Ministerio para a Transformación Dixital e da Función Pública, case un ano despois de que expirase o Acordo Marco para unha Administración do Século XXI e tras meses de mobilizacións do persoal público.
A presión sostida das empregadas e empregados públicos, e o compromiso sindical demostrado nas concentracións do pasado verán, obrigaron ao Goberno a retomar o diálogo. O encontro celebrado hoxe coa secretaria de Estado de Función Pública, Consuelo Sánchez, e a directora xeral, María Hilda Jiménez, serviu para establecer un calendario de reunións semanais que comezarán a próxima semana.
O proceso negociador articularase en dous bloques: o primeiro centrado en emprego público –que abordará a recuperación do emprego perdido, a estabilización e o rexuvenecemento dos cadros de persoal–, e un segundo bloque, a partir do 19 de novembro, dedicado a salarios, tras case un ano de conxelación. O obxectivo é alcanzar un novo acordo plurianual (2026-2028) que inclúa unha suba retributiva por riba do IPC e un capítulo específico para a actualización salarial pendente con efectos retroactivos.
Desde FECCOO lembramos que, a pesar deste paso adiante, a negociación chega tarde e aínda quedan numerosos compromisos sen cumprir: a xubilación parcial de todas e todos os empregados públicos, a suba ao A1 e de nivel para todos os corpos docentes, a implantación da xornada de 35 horas, a regulación real do teletraballo…
A nosa organización considera que abrir a mesa de negociación é un avance, pero insiste en que os atrasos acumulados e a falta de execución do acordado previamente non poden repetirse. FECCOO manterá unha actitude construtiva, pero esixente, en defensa do conxunto das traballadoras e traballadores do sector público educativo e do resto da Administración.
Porque tras case un ano de espera, non basta con volver falar: é hora de cumprir.