Toda a información da Mesa Sectorial sobre oposicións e formación permanente do profesorado

En canto á oferta de prazas, volvemos a remarcar que estamos de novo ante unha ocasión perdida de convocar unha oferta de emprego público que realmente permita a reposición da totalidade de xubilacións dos últimos anos e manter ao mesmo tempo as taxas de interinidade nun nivel próximo ao que marca como obxectivo o “Acordo de persoal docente interino e substituto”.

No relativo á distribución de prazas por especialidades queremos realizar dúas reflexións principais: 

• En primeiro lugar, como xa remarcamos no punto anterior, hai unha evidente descompensación de oferta no corpo de mestres, con 426 prazas, cando o 120 por cento das xubilacións superarían case en 100 prazas esa cifra. 
• Por outro lado, parece este ano exigua a oferta en especialidades que se ocupan da atención á diversidade, nomeadamente Pedagoxía Terapeútica e Audición e Linguaxe, en consonancia coa redución de efectivos nesas especialidades ás que asistimos nos últimos cursos, aspecto este que nos preocupa enormemente.

Reclamamos que haxa unha coherencia entre as prazas convocadas e as vacantes de concurso de traslados que se oferte nos próximos anos. Non ten moito sentido que gran parte do persoal que accede se vexa abocado a permanecer unha gran cantidade de cursos en situación de expectativa de destino, como xa ocorreu no pasado.

Como cada ano, volvemos a esixir á Administración que asegure que se leva a cabo un verdadeiro concurso oposición en todos os corpos e especialidades. En anteriores procesos, só superaron a fase de oposición un número de aspirantes igual ou menor ao de prazas convocadas. Ou directamente xa non supera a primeira proba máis que un número testemuñal, quedando desertas xa na primeira proba unha gran cantidade de vacantes, como pasou neste útimo proceso en Informática con 22 prazas desertas de 50 convocadas (44 %), ou en Sistemas e Aplicacions Informáticas 49 de 65 prazas desertas (75%), ou, por exemplo, en 2022 tamén coa especialidade de Informática na que 36 de 43 prazas (83 %) quedaron desertas no primeiro exame. Pedimos á Dirección Xeral que reúna previamente as presidencias dos tribunais e insistan na obriga de cumprir a lei e, polo tanto, de non efectuar “cribas artificiosas” en función do número de prazas dispoñibles no tribunal. Lembramos que hai sentenzas neste sentido. 

Con carácter previo ás emendas concretas artigo por artigo queremos realizar unha serie de consideracións de carácter xeral sobre a actuación dos tribunais e o desenvolvemento dos procesos selectivos:

• Demandamos un número suficiente de tribunais de forma que as ratios aspirantes/tribunais sexan baixas para que poida pasar á segunda proba todas as persoas aspirantes que superen a primeira proba, sen argumentar problemas de datas para non facelo.
• Solicitamos que se melloren os criterios de selección dos/as presidentes/as dos tribunais. Xa que actualmente a súa selección non obedece a criterios de preparación nin capacidade. Debería asegurarse unha formación suficiente previa á constitución dos tribunais.
• Da mesma forma, esiximos que a constitución dos tribunais sexa coa suficiente antelación para asegurar unha axeitada coordinación entre os membros dos tribunais, máis considerando que o sorteo dos vogais é o 10 de abril segundo a convocatoria e os tribunais adoitan a constituirse a inicios do mes de xuño.
• Demandamos que todos os tribunais estean formados por profesorado da especialidade en todos os casos e non “só cando sexa posible”.
• Deberían eximirse da obrigatoriedade de actuar á totalidade dos membros dos equipos directivos, xa que no mes de xullo desenvolven no seu centro labores de peche do curso actual e preparación do curso seguinte. En todo caso, debería asegurarse que varios membros dun mesmo equipo directivo non coincidan á vez actuando no mesmo proceso selectivo.
• Deberían poder acollerse á suplencia os e as docentes que se atopen desfrutando do permiso de lactancia.
• Consideramos igualmente que o cargo de responsable de centro de menos de tres unidades debe considerarse análogo ao de director/a para poder voluntariamente non actuar en caso de saír no sorteo.
• Deberase publicar, como xa se fixo nos anos anteriores, na web da Consellería, a composición final dos mesmos e non só nos lugares de celebración das probas.
• Demandamos que se asegure que a adaptación de tempo e medios para quen a solicite se resolva por parte dos tribunais co tempo suficiente, para que a persoa opositora coñeza as condicións ás que se debe enfrontar no desenvolvemento das probas.
• As datas e lugares de celebración das probas deben ser publicitados con suficiente antelación para que os opositores poidan organizarse, e non xurdan problemas como en anos anteriores pola escasa antelación á celebración das probas.
  O PROCESO DE CONCURSO OPOSICIÓN INICIARASE O SÁBADO 21 DE XUÑO DE 2025
• Entendemos que cada vez se fai máis necesaria a constitución de comisións de selección para garantir a igualdade de condicións de partida dos aspirantes. Desta forma os temas e o exercicio práctico da primeira parte da proba deben ser os mesmos para todos os tribunais de cada especialidade, aínda que as prazas estean repartidas, garantiríanse as mesmas condicións de ingreso para todas as persoas aspirantes e ao mesmo tempo as mesmas condicións para o acceso ás listas de interinidades, polo tanto, a proba debe ser a mesma en todos os tribunais da mesma especialidade.
• Relacionado con isto último, deben establecerse protocolos de actuación comúns para que cada tribunal non actúe de modo arbitrario sobre todo en tribunais da mesma especialidade.
• Esiximos que os tribunais deberan publicar con antelación ao acto de presentación unhas normas claras sobre o formato das probas escritas.
• Solicitamos, como xa pasou nos procesos selectivos celebrados na pandemia, que se aseguren mecanismos de comunicación co tribunal de forma bidireccional, para así facilitar a achega de documentación xustificativa ou reclamacións por parte dos aspirantes.
  REXEITADO
• Solicitamos que a publicación das notas de cada proba se faga diariamente.
• Esiximos que se elimine a función de valoración de méritos dos aspirantes polos tribunais. Esta función debería recaer na Dirección Xeral de Centros e Recursos Humanos. En todo caso, os méritos que figuran no expediente persoal, non só os servizos, senón tamén titulacións e formación, deberían ser xa valorados de oficio e evitar así de novo a súa achega polos aspirantes.
• No actual borrador elimínase a posibilidade de reclamar ante o tribunal nos dous días seguintes. Debe recollerse tal posibilidade e así mesmo, demandamos que se debe explicitar na convocatoria de modo claro o procedemento de reclamación da nota perante os tribunais, así como a posibilidade de gravación das probas orais, para dar as máximas garantías ao persoal opositor.
  REXEITADO POR DIFICULTADES TÉCNICAS E DE CUSTODIA DAS GRAVACIÓNS
• Valoramos positivamente a obrigatoriedade de publicar por parte dos tribunais os enunciados, solucións e modelos de corrección e, de ser o caso, dos propios exercicios. Demandamos que se implementen os mecanismos necesarios desde a Dirección Xeral para que a totalidade de tribunais cumpran con tal obrigación.
• Finalmente, en canto á actuación dos tribunais, levamos varios anos asistindo a retrasos, ao noso xuízo inxustificados, no abono das compensacións económicas e gastos de manutención e desprazamento por membros de moitos tribunais. Tal retraso chega a superar o propio ano fiscal na que se desenvolveron as probas cos prexuízos que pode ocasionar ás persoas que actuaron como membros de tribunais. Este ano non é unha excepción e coa mensualidade de xaneiro aínda moitos tribunais de diversos corpos e especialidades non recibiron os abonos económicos. Consideramos este retraso como intolerable e demandamos que se establezan as medidas necesarias para que non suceda no futuro.

Indo artigo por artigo, temos as seguintes emendas concretas:

• Base 1.5: Non aparece explicitado, como si aparecía nas anteriores convocatorias, en que localidade ou localidades actuaría o tribunal Nº1 de cada especialidade. En todo caso, volvemos a solicitar que se habilite a posibilidade de que as persoas con discapacidade do corpo de mestres, poidan, como no caso de acceso A2 a A1 concurrir á localidade de exame da súa elección. Estes aspirantes contan en moitos casos con dificultades de mobilidade ou dependen doutras persoas para poder desprazarse, polo que deberían ter as máximas facilidades para poder concurrir en igualdade de condicións.
  INCORPORARANO AO DOCUMENTO
• Base 2.4: En caso de persoal ao que se lle recoñeza con efectos retroactivos un grado de discapacidade igual ou superior ao 33% con posterioridade ao proceso de matriculación debería permitirse a súa incorporación ao turno de reserva para persoas con discapacidade, sempre que os efectos do recoñecemento sexan anteriores ao último día de entrega de solicitudes.
• Base 3.8: Demandamos a gratuidade da matrícula para os demandantes de emprego que non estean a cobrar prestación ou subsidio en lugar dunha bonificación de só o 50 % e que este requisito, ao igual que o resto, se considere a final do prazo de presentación de solicitudes.
• Base 7.11: Demandamos que se recolla expresamente na convocatoria que poidan solicitar a adaptación de tempo e medios persoais que non conte con discpacidade recoñecida, pero si con outras patoloxías ou trastornos que en virtude dos informes médicos presentados, fagan recomendable tal adaptación.
• Bases 8 e 9: As persoas opositoras que teñan superado a proba de coñecemento de castelán e/ou galego en convocatorias anteriores deben estar exentos de realizala, e máis considerando a gran criba de aspirantes que supuxo en concreto o exame previo de galego nos anteriores procedementos selectivos, na que soamente 36 aspirantes de 270 foron calificados de apto. Case o 90 por cen dos aspirantes non superaron a proba e non puideron presentarse ao concurso oposición, moitos deles que superaran as probas en anos anteriores demostrando daquela ese coñecemento. De aí que non entendamos que non se consideren como exentos de volver a realizarla.
  REXEITADO, A LEXISLACIÓN É A QUE É
• Base 10.1: faltaría por detallar, que si figuraba o ano pasado, a data a partir da cal se poderían iniciar as probas. Non entendemos que a Dirección Xeral non poida xa dar esa data, para así reducir a incertidume en persoal participante no proceso.
  O PROCEDEMENTO DE CONCURSO OPOSICIÓN INICIARASE O SÁBADO 21 DE XUÑO DE 2025
• Base 10.2: Solicitamos unha nova redacción para que quede totalmente clara a orde de actuación dos aspirantes das diversas quendas, xa que rexistramos nas últimas convocatorias erros na orde de citación de aspirantes.
  INSISTIRÁN AOS TRIBUNAIS SOBRE A ORDE DE ACTUACIÓN
• Base 10.3: Solicitamos que se debería substituír 24 h por 48 h no tempo mínimo de antelación de chamamento para persoal opositor, xa que cun chamamento con tanta premura non se favorece o desprazamento dos opositores que poden estar nun tribunal lonxe do seu enderezo habitual.
• Na base 11.3 volvemos a instar a que se consideren de oficio a totalidade de méritos que figuren no expediente persoal das persoas aspirantes, e non soamente os relativos a experiencia para a Consellería de Educación. Tamén nesta base, consideramos escaso e que se debe incrementar o prazo de tres días a cinco días hábiles para reclamar as puntuacións da fase de concurso.
• Base 16: Non están detalladas as especialidades nas que se require proba práctica no exame de acceso a subgrupo superior.
  É UN ERRO, FALTA POR DETALLAR
• Base 18: Os criterios de avaliación da proba de desempate, no caso de ser necesaria a súa realización, deben ser públicos.
• Base 20.1: Solicitamos incrementar a 3 días o prazo para solicitar destino provisional as persoas aprobadas.
  REXEITADO POR CUESTIÓN DE PRAZOS MOI AXUSTADOS
• Base 20.7: Consideramos que debe recollerse que en caso de non formular opción pola percepción da remuneración se lle aplicarán as retribucións que favorezan máis á persoa traballadora.
• Base 24.6: Consideramos que habería que detallar nos procedementos de adquisición de novas especialidades en que debería incidir máis o persoal aspirante: en aspectos científicos, didácticos, ou nunha combinación dos dous. Xa que existen dúbidas entre os/as aspirantes de como deben orientar o exame.

EN CANTO AO BAREMO RECLAMAMOS:

• Que sexan puntuados no apartado 2.2 máis dun doutourado ou mestrado oficial, en caso de que a persoa aspirante presente máis dun título.
• Que deben puntuarse tamén outros premios extraordinarios como o de grao ou mestrado oficial, aínda que somos conscientes de que non está contemplado no RD 276/2007.
• Que se valore tamén o B2 como equivalente a nivel avanzado no apartado 2.4 e 2.5, como viña puntuándose en anteriores procesos, xa que polo Real Decreto 1041/2017 e polo Decreto 81/2018 tales niveis son equivalentes ao nivel avanzado.
  NON ACEPTADO
• Que se computen os niveis de lingua galega de B2 e C1 en apartado 2.4, como viñan puntuándose en concursos oposicións de anos anteriores, sempre que o requisito de posesión de CELGA 4 sexa xustificado doutra forma; xa que o nivel C1 é equivalente a CELGA 4 pola orde que recolle os certificados CELGA, pero a posesión do CELGA 4 non implica en ningún o caso o recoñecemento dun nivel C1 do Consello de Europa.
  REXEITADO. O C1 É REQUISITO E POLO TANTO NON SE BAREMARÁ
• Que se inclúan as linguas cooficiais tamén no apartado 2.5, non só estranxeiras, tal e como está, o C1 en catalán ou euskera expedido por unha universidade non valería en ningún epígrafe.
• En todo caso, consideramos, como xa dixemos nas alegacións ao articulado, que méritos que figuran no expediente persoal, non só os servizos, senón tamén titulacións e formación, deberían ser xa valorados de oficio e evitar así de novo a súa achega polas persoas aspirantes.

EN CANTO ÁS PROBAS PRÁCTICAS, CONSIDERAMOS:

• Débense dar a coñecer os medios técnicos necesarios para o desenvolvemento das probas prácticas coa maior antelación posible, non esperar á semana previa ou ao acto de presentación como xa se fixo nalgunhas especialidades.
• Necesidade de expresar a duración máxima da proba práctica naquelas especialidades nas que non está reflectida, por exemplo en Música.
• Debe especificarse o tipo e contido da proba práctica en especialidades nas que está de forma moi xenérica. Por exemplo, Matemáticas ou Física e Química, contrastando con outras, como a maioría de FP ou mestres onde se detallan cada apartado que pode ser obxecto de exercicio de carácter práctico.
  REVISARASE