Toda a información da Mesa Sectorial do Concurso de Orientación de Primaria

• Queremos destacar que, ano tras ano, hai neste concurso a posibilidade de adxudicar vacantes de xefatura de departamento de orientación en centros de infantil e primaria a persoas sen a titulación adecuada. Isto dificulta o correcto desenvolvemento do labor orientador, coma tal, nas probas diagnósticas. Nos últimos catro concursos detectamos ata 17 vacantes adxudicadas a mestres/as sen titulación axeitada.
• Consideramos imprescindible esixir como requisito, e non só como dereito preferente, as titulacións recollidas no artigo 4 do Decreto 120/1998 para poder ser adxudicado/a neste concurso. De ser necesario, debería modificarse o Decreto 120/1998 para establecer a obrigatoriedade da titulación. Resulta incoherente esixir a titulación para substitutos/as e interinos/as e non para quen ocupa o posto de xeito definitivo.
• Moitas titulacións mencionadas no artigo 4 do Decreto 120/1998 xa non están vixentes (como a Licenciatura en Filosofía e Letras ou Psicopedagoxía). Propoñemos actualizar esta lista, incluíndo novas titulacións como o Mestrado en Psicopedagoxía, que, xunto coa titulación de mestre/a, habilitaría para o desempeño das funcións.
• Pedimos abordar a reconfiguración da rede de Orientación, que non se actualiza desde 2009. Isto provocou desequilibrios nas provincias, polo que solicitamos unha actualización antes do concurso de traslados, tal como se fai noutros concursos similares.
  
  Comprométense a analizar a nosa petición.

• Non consideramos aceptable que na base 2.ª se indique que o anexo II recolle os centros que, previsiblemente, estarán adscritos ao centro base. Estes centros deberían coñecerse con antelación. Ademais, solicitamos que, de modificarse os centros adscritos a unha praza, se lle dea ao docente a opción de escoller ser suprimido, mesmo se non se modifica o centro base, xa que entendemos que se produce unha modificación substancial das condicións de traballo.

En relación co baremo, aínda que somos conscientes de que moitos aspectos están regulados por normativa básica e son inamovibles, queremos expresar o noso desacordo con varios puntos.

• No apartado 1.1.3, sobre postos de especial dificultade, consideramos que a puntuación xerada nestes postos non debería perderse ao cambiar de destino definitivo. Ademais, solicitamos que se recoñezan de oficio os servizos prestados en destinos provisionais ou definitivos en centros de especial dificultade.
• No apartado 3, notamos a ausencia de valoración para os premios extraordinarios nos mestrados, que deberían ter a mesma consideración ca os premios de doutoramento, grao e outras titulacións.
• No apartado 4:
  • No punto 4.1, referente aos servizos como director/a de centro, deben incluírse os servizos prestados como responsables de centros con menos de tres unidades, dado que estas persoas asumen as mesmas funcións que os directores/as, incluíndo a totalidade de coordinacións e dinamizacións (lingua galega, extraescolares, etc.).
  • No punto 4.3, sobre outras funcións docentes, observamos que seguen excluíndose postos de coordinación e dinamización como o de coordinador Edixgal ou a recente Dinamización de Polos Creativos.
    
    Vano revisar.

• Tamén consideramos que deben puntuarse os cargos e coordinacións desempeñadas polo profesorado substituto. Esta situación resulta especialmente inxusta nas titorías e xefaturas de departamento unipersoal ou de orientación, xa que o substituto debe asumir estas funcións sen recibir puntuación nin complemento económico, a pesar de cumprir coas obrigas.

• Canto ao apartado de publicacións, levamos anos denunciando que é incomprensible que non se puntúen aquelas que non teñen depósito legal. Ademais, pedimos máis transparencia por parte da comisión avaliadora para que as persoas interesadas poidan coñecer os motivos da non baremación dalgunhas publicacións.
• Reiteramos, coma nos últimos anos, a urxencia de detallar claramente a puntuación que se obtén pola participación, coordinación e impartición en actividades de innovación educativa no apartado 6.2. Actualmente, a Consellería non especifica esta información no baremo da orde nin nas súas instrucións. Por experiencia, sabemos que cada participación conta con 0,15 puntos, independentemente da duración ou responsabilidade da actividade (coordinación ou impartición).
• Consideramos incoherente valorar como mérito diferenciado que se ocupasen postos na Administración educativa, xa que a antigüidade xa se puntúa nos apartados 1.1 e 1.2, así como en varios cargos do apartado 4.
• No apartado 6.6, solicitamos que se puntúen as titorizacións de títulos previos á implantación de graos e mestrados, sempre que sexan equivalentes. Non compartimos, pero entendemos, que o real decreto limite esta posibilidade, facendo que só se puntúen as titorizacións de funcionarios/as en prácticas a partir do curso 2023/24.
• Por último, no Anexo III de vacantes, faltaría incluír vacantes por xubilación no CRA Antía Cal, no CRA de Dodro, no CEIP de Agolada, no CEIP Alexandre Rodríguez Cadarso e no IES A Sangriña. Tamén faltaría incluír unha segunda vacante de orientación no CEIP de Prácticas de Ourense.
  
  Tamén reclamamos a creación dunha segunda vacante de orientación no CEIP de Prácticas de Ourense, xa que a persoa titular da praza de Orientación atópase en comisión de servizos en postos da Administración Educativa dende hai anos. Como resultado, a praza sae cada ano no CADP e é ocupada por unha persoa diferente cada curso, o que dificulta enormemente a continuidade do traballo no centro.
  
  CRA Antía Cal (compartida co CEIP Souto-Donas), CRA de Dodro, CEIP Alexandre Rodríguez Cadarso.
  
  Ademais das reclamadas, incorpórase unha vacante no CRA de Rianxo.
  
  O CEIP Valle-Inclán pasa a ser centro base, no canto do CPI O sello. O CEIP das Vendas da Barreira cambia, como centro base, co CEIP Raúl Fernández.