Neste artigo atoparás información útil sobre os trámites que debes realizar unha vez aprobada a oposición. O noso obxectivo é ofrecerche información clara para que poidas afrontar con confianza esta nova etapa.
Tes información máis detallada neste titorial en PDF.
Pedir destino para o curso 2024/25
Tes que solicitar destino para o curso que vén, como funcionario/a en prácticas. Isto faise participando no CADP (Concurso de adxudicación de destinos provisionais), en https://www.edu.xunta.gal/cadp/, no prazo de dous días hábiles desde a publicación da lista de persoas aprobadas do teu tribunal.
É preciso dispor dun usuario corporativo @edu.xunta.gal. Se non o tes xa, debes solicitalo á UAC (Unidade de atención a centros), no teléfono 881 99 77 01.
Que documentos terei que entregar?
Xa con máis tranquilidade, no prazo de 20 días hábiles após a publicación no DOG das listas de persoas aprobadas, que adoita publicarse na segunda quincena de agosto, deberás presentar por medios electrónicos e dirixido á Dirección Xeral de Centros e Recursos Humanos os seguintes documentos:
- informe médico,
- declaración responsable,
- certificado de non ter antecedentes por delitos sexuais (só no caso de terte oposto á consulta).
Como fago a toma de posesión?
A toma de posesión faise en setembro no centro no que obteñas destino. Desde o centro remitirán a documentación á Xefatura Territorial correspondente.
Darte de alta como mutualista de MUFACE
MUFACE (Mutualidade de funcionarios civís do Estado) é a mutua en que están obrigatoriamente incluídos todos os funcionarios e funcionarias de carreira. A súa función principal é prestar asistencia sanitaria e social ás persoas adscritas.
Hai que darse de alta tras a toma de posesión no centro e tras recibir o nomeamento como funcionario/a en prácticas.
Recibirás un correo electrónico de MUFACE con instrucións para darte de alta, para o que necesitarás acceso Cl@ve.
Como mutualista, podes elixir entre prestación sanitaria co SERGAS ou con algún dos seguros privados concertados con MUFACE: DKV, ASISA ou Adeslas. Cada ano, no mes de xaneiro poderás cambiar de entidade.
Realiza a fase de prácticas
É tutelada, dura catro meses e ten como obxectivo principal avaliar as capacidades didácticas das persoas aspirantes á docencia.
Durante a fase de prácticas, é necesario realizar:
- Un informe memoria final.
- Un curso de formación de lingua galega de 20 horas de duración.
- Un curso de formación en igualdade e prevención e loita contra a violencia de xénero.
- Unhas xornadas formativas de coñecemento da administración educativa galega.
A avaliación final expresarase nos termos «apto» ou «non apto». No caso de non superar a fase de prácticas, situación moi infrecuente, pódese repetir o vindeiro curso.
Por causa xustificada, pódese solicitar o aprazamento da fase de prácticas á Dirección Xeral de Recursos Humanos.
Por último, no elemento «Ensino público» do menú superior, podes atopar moita máis información de utilidade para esta nova etapa.