CCOO avanza no recoñecemento dos dereitos económicos da avaliación positiva da actividade investigadora do PDI funcionario e laboral a tempo parcial
CCOO leva desde o ano 2016 reclamando
- O dereito á avaliación da actividade investigadora do PDI, con independencia de que a súa relación coa universidade sexa funcionarial ou laboral, permanente ou temporal; ou que a súa dedicación sexa a tempo completo ou parcial.
- E, en caso de avaliación positiva, a percibir o correspondente complemento salarial.
O complemento pola avaliación da actividade investigadora («sexenios») é un complemento de actividade e, se esta se realiza, o recoñecemento ten que ser pleno para todos os efectos. En particular, non se pode excluír o profesorado a tempo parcial.
Esta cuestión formulouse en primeiro lugar ante as diferentes universidades, pero vista a negativa destas na maioría dos casos a recoñecer este dereito e chegar a un acordo, foise trasladando á vía xudicial mediante demandas ou recursos individuais e mediante conflitos colectivos (no caso do PDI laboral) ou recursos contencioso-administrativos (para o PDI funcionario) ante os tribunais superiores de xustiza das comunidades autónomas, procesos que chegaron ata o Tribunal Supremo. As ditas demandas fóronse resolvendo en case todos os casos con sentenzas favorables aos criterios defendidos por CCOO e, por tanto, recoñecendo este dereito. Porén, as universidades, lonxe de asumir as súas obrigas cos seus cadros de persoal de PDI, recorreron esas sentenzas en boa parte dos casos, o que impide na maioría deles a súa aplicación efectiva.
Neste contexto debe situarse a recente sentenza 921/2025 de 26 de novembro de 2025 da Sección Terceira da Sala do Contencioso-Administrativo do Tribunal Superior de Xustiza de Madrid (TSXM), que admite a demanda presentada por CCOO contra a resolución da Secretaría Xeral de Universidades do 27 de decembro de 2021 sobre a aprobación de convocatoria de avaliación de actividade investigadora, na que CCOO entendía que se discriminaba o PDI a tempo parcial. A decisión da sentenza anula o artigo 3.1.c da convocatoria da actividade investigadora de referencia e recoñece o pleno dereito do PDI funcionario a tempo parcial a percibir o complemento salarial vinculado á avaliación positiva da súa actividade investigadora, sen necesidade de esperar a prestar o servizo a tempo completo. E aínda que a sentenza non é firme (pode ser recorrida en casación ante o Tribunal Supremo), a súa contundencia fai pensar que o devandito recurso non se concrete.
Nesta liña, CCOO presentou o pasado mes de xullo un recurso contencioso-administrativo ante a Sala do Contencioso-Administrativo do TSXM contra a convocatoria de avaliación da actividade investigadora do ano 2024, por entender que se discrimina o PDI funcionario a tempo parcial ao non recoñecer os efectos económicos da avaliación positiva da actividade investigadora deste persoal. Esta reclamación referénciase na sentenza 664/2025 do Tribunal Supremo, Sala do Contencioso Administrativo, do 29 de maio de 2025, que modifica o artigo 5.2 do Real decreto 1086/1989, de 28 de agosto, sobre retribucións do profesorado universitario, no sentido de anular a prohibición de que o profesorado a tempo parcial perciba o complemento salarial vinculado á avaliación positiva da actividade investigadora. Isto significa que o Tribunal Supremo declara nulo o parágrafo onde se exclúe o PDI do aboamento do complemento de produtividade, por considerar que vulnera o artigo 14 da CE.
Estes procesos teñen o seu punto de partida na sentenza núm. 135/2017 do Xulgado Central do Contencioso-Administrativo núm. 8 que resolveu o recurso presentado por CCOO contra a resolución do 30 de novembro de 2016, da Secretaría de Estado de Avaliación, Formación profesional e Universidades para a avaliación da actividade investigadora do ano 2016. Esta sentenza veu recoñecer o dereito do profesorado funcionario interino a someter a avaliación a súa actividade investigadora. Como consecuencia desta sentenza, abriuse o camiño á reclamación do dereito á avaliación da actividade investigadora do PDI a tempo parcial, maioritariamente profesorado non permanente, que é o que se está recoñecendo agora en diferentes sentenzas.
No ámbito do PDI laboral, o avance foi paralelo, ata chegar a dúas sentenzas da Sala do Social do Tribunal Supremo (sentenzas nº 70/2023 da Sala do Social do TS de 25 de xaneiro de 2023 –Madrid– e 510/2024 da Sala do Social do TS de 20 de marzo de 2024 –Andalucía–), que lle recoñecen ao PDIL laboral temporal o dereito a someter a actividade investigadora realizada cada seis anos a unha avaliación e, en caso de superala favorablemente, a percibir, se der lugar, un complemento por méritos investigadores nos mesmos termos que o persoal docente e investigador permanente.
Sobre a base do anteriormente exposto, pódese concluír que:
- A xurisprudencia do Tribunal Supremo establece que o PDI, sexa cunha relación funcionarial ou laboral, sexa permanente ou temporal, cunha dedicación a tempo completo ou parcial, ten dereito a someter a avaliación a súa actividade investigadora desenvolvida durante un período de seis anos e, en caso de valoración positiva, a percibir o complemento salarial correspondente.
- E que este dereito debería recoñecerse de oficio na próxima convocatoria de sexenios do ano 2025 pendente de publicación.
En función do contido da dita convocatoria, informarémosvos do procedemento que hai que seguir no suposto de que este dereito non se recolla finalmente ou, de facelo, para aquelas persoas que teñan períodos avaliados positivamente de forma previa a esta convocatoria, pero non se lles aboaran. Desde CCOO seguiremos traballando para o recoñecemento profesional e salarial do conxunto da actividade do profesorado universitario.