Desde a última noticia deste tema, tiveron lugar dúas xuntanzas da mesa negociadora: unha, o día 28 de maio, sen ningún tipo de avance significativo, e outra, o 12 de xuño, na que se puideron estudar e debater diferentes aspectos pendentes en materia salarial.
Así, aos consensos xa acadados en materia retributiva, engádense os seguintes aspectos que darían lugar a unhas novas táboas salariais:
- Para responder mellor ás especiais circunstancias e condicións das persoas traballadoras en campamentos e colonias, establecerase unha nova regulación do tempo de traballo e crearase un novo grupo profesional: grupo IV – persoal de atención directa en servizos de casas de colonias e campamentos, con pernocta.
- Este grupo profesional incluiría os novos postos de coordinador/a de campamentos e casas de colonias e de monitor/a de campamentos e casas de colonias.
- Estes novos postos poderán optar por gozar de días adicionais de descanso unha vez rematada a actividade ou ben por un complemento de xornada especial de 18 € por cada día de traballo. Isto suporía unha importante mellora salarial, xa que viría substituír o actual plus de dispoñibilidade, que representa o 10 % do salario diario, moi inferior ao novo complemento.
- Recolleríase un anexo adicional explicativo, coas funcións e singularidades destas xornadas especiais e o procedemento de compensación.
- Axústanse as subas non lineais, para novos pregos, quedando os incrementos acumulados, segundo os postos de traballo, entre un +11 % e un +18 % entre 2025 e 2027.
- Para os pregos en vigor e centros non suxeitos a contratación pública, os incrementos serían do 4,5 % en total, repartidos entre os anos de vixencia do convenio.
- Finalmente, en outubro de 2027, todos os salarios das persoas traballadoras do sector converxerán nas mesmas contías.
Desde CCOO estamos a liderar a negociación para que se inclúan na clasificación profesional os seguintes novos postos de traballo:
- Titulado/a de grao en Biblioteca, Técnico/a en xestión, Técnico/a de atención especializada, Dinamizador/a de biblioteca.
- Técnico/a especialista auxiliar de biblioteca.
- Titulado/a de grao, Técnico/a de atención especializada en museos e xacementos arqueolóxicos.
A próxima xuntanza terá lugar o vindeiro 7 de xullo, coa previsión de poder pechar a negociación en materia de clasificación profesional, recompilar todos os ámbitos xa negociados e acordados con anterioridade, e avanzar cara ao peche do IV convenio colectivo.