A universidade pública deféndese actuando
CCOO presentou o pasado mes de maio un escrito dirixido ao Defensor do Pobo no que solicita a presentación de recurso de inconstitucionalidade contra a Lei 1/2026, de 6 de marzo, Universitaria para Andalucía (LUPA), publicada no Boletín Oficial de la Junta de Andalucía.
Desde CCOO entendiamos que a LUPA contiña elementos que poderían vulnerar principios constitucionais, como a autonomía universitaria nas súas dimensións de capacidade das universidades de autogoberno e autorregulación, para establecer unha liña docente e investigadora de seu e de autonomía económica e financeira. Ademais, considerabamos que invade competencias reservadas ao Estado e desenvolvidas mediante unha lei orgánica (LOSU), como é a da creación de figuras docentes e investigadoras (por exemplo, a do profesor/a axudante), suprimida pola normativa estatal.
Neste sentido, a resolución adoptada polo Defensor do Pobo entende que a vía idónea para solucionar esta cuestión é o procedemento recollido no artigo 33.2 da Lei orgánica 2/1979, de 3 de outubro, do Tribunal Constitucional, para delimitar se a LUPA contén elementos que atentan contra principios constitucionais, unha vez aberto polo Ministerio de Política Territorial e Memoria Democrática.
O mencionado artigo 33.2 da Lei orgánica 2/1979 vén ampliar de tres a nove meses o prazo para a presentación de recursos de inconstitucionalidade polo Goberno, se na Comisión Bilateral de Cooperación entre a Administración Xeral do Estado e a respectiva comunidade autónoma creada para o efecto non se alcanza un acordo sobre as discrepancias existentes en relación coa constitucionalidade da LUPA, acordo que, de se producir, podería supoñer a modificación do texto legal.
Debe sinalarse que esta iniciativa do Goberno se produce con posterioridade e a raíz da presentación da solicitude de CCOO ao Defensor do Pobo. A argumentación e as obxeccións alegadas para a aplicación deste procedemento coinciden cos expresados por CCOO no seu escrito dirixido ao Defensor do Pobo canto á posible vulneración da normativa básicaestatal e a competencia exclusiva do Estado en determinadas materias (como a creación de figuras contractuais á marxe da LOSU) amparada no artigo 149.1.30.ª CE e á inxerencia sobre a autonomía universitaria constitucionalmente garantida polo artigo 27.10 CE.
Isto supón que as cuestións sinaladas pola nosa organización non eran unha esaxeración nin unha alarma infundada. A autonomía universitaria, a posible invasión de competencias estatais e a necesidade de depurar a norma deberán abordarse agora na Comisión Bilateral de Cooperación entre a Administración Xeral do Estado e a Xunta de Andalucía.
CCOO esíxelle ao Goberno de España e á Xunta de Andalucía que a Comisión Bilateral non sexa unha manobra para gañar tempo nin un trámite de despacho. Ten que servir para revisar a fondo os aspectos da LUPA que afectan á autonomía universitaria, á seguridade xurídica do sistema e ás condicións de traballo do persoal universitario.
As comunidades autónomas deben escoitar a comunidade universitaria. Non poden pretender lexislar sobre a universidade pública de costas a quen a sostén cada día: o persoal docente e investigador, o persoal técnico, de xestión e de administración e servizos, o estudantado e o conxunto da sociedade.
Por iso CCOO seguirá actuando nas institucións, nos centros de traballo, nas universidades e na rúa. Porque defender a universidade pública é defender o que é de todos e de todas.