O pasado mes de xullo coñecemos o texto do «Proxecto de Real Decreto polo que se establecen as especialidades de coñecemento para os efectos do establecemento dos perfís dos concursos das prazas de profesorado universitario das universidades públicas e os ámbitos de coñecemento para os efectos da adscrición dos postos de traballo do profesorado universitario», documento ao que CCOO presentou as correspondentes alegacións.
Desde ese momento, sabemos que existen distintas versións deste proxecto de real decreto que se foron modificando no tempo tomando como base as achegas de distintos axentes, pero descoñécese o contido do proxecto. Non podemos compartir a formulación do Ministerio, que entende que o dereito das empregadas e empregados públicos a negociar aquelas cuestións que afectan as súas condicións de traballo se reduce, no mellor dos casos, a meras reunións informativas coa representación legal deste colectivo.
Entender que cuestións como as RPT do PDI, as especialidades e ámbitos do coñecemento, o sexenio de transferencia, a docencia en liña, o efecto da IA no ámbito académico, etc. non son condicións de traballo do profesorado, non só supón ignorar a realidade dos feitos, senón que transmite unha concepción corporativa e paternalista do colectivo. Os dereitos das persoas traballadoras, desde a catedrática de universidade ata o persoal que atende as consellerías, deben ser obxecto de negociación colectiva en todos os ámbitos onde se formulen, desde o ministerial ata o centro de traballo. Non o facer supón un incumprimento das obrigas legais e, ademais, contribúe á indefensión e o abandono á súa sorte do colectivo docente e investigador.
Na reunión celebrada o xoves 25 de setembro de 2025 para reactivar a negociación do Estatuto do PDI, de forma previa a abordar o obxecto da reunión, tratáronse distintas cuestións, entre as que se encontraba o estado de tramitación deste real decreto polo que se establecen as especialidades e os ámbitos de coñecemento.
En relación con esta cuestión, informouse de que:
- O documento está moi avanzado tras recibir as achegas das universidades, a CRUE (coa que o acordo é completo), asociacións de decanos, etc.
- Froito deste proceso, e co obxecto de recoñecer a diversidade das universidades, pasouse de:
- 39 a 50 ámbitos de coñecemento;
- 191 a 314 especialidades; a especialidade vén a coincidir co perfil da praza.
- En liña co reclamado por CCOO respecto a calquera procedemento normativo do MICIU, o ministerio convocará as organizacións sindicais nun prazo estimado de non máis de 15 días a unha reunión para presentarlles o texto resultante, antes de iniciar o proceso de información pública.
Unha vez finalizada a redacción do documento, iniciarase o proceso formal de aprobación, que comezaría coa apertura do procedemento de información pública.
CCOO defende, e así o plasmamos nas nosas alegacións, que, na medida en que o contido do proxecto de real decreto afecta de forma directa as condicións de acceso ao emprego público, aos criterios que se aplicarán para o desenvolvemento da carreira profesional e a promoción e as condicións de traballo do dito colectivo, estamos ante materias que deben ser obxecto de negociación colectiva, tanto na definición da norma como no seu desenvolvemento no marco das diferentes universidades públicas e os seus órganos de representación.
Outras informacións sobre proxectos normativos
Nesta mesma reunión, o MICIU informounos de que está traballando en:
- A reforma do Real decreto 1791/2010, de 30 de decembro, polo que se aproba o Estatuto do Estudante Universitario. O texto está bastante avanzado e traballouse con organizacións estudantís e a CRUE.
- A reforma do Real decreto 822/2021, de 28 de setembro, polo que se establece a organización das ensinanzas universitarias e do procedemento que asegure a súa calidade. Creouse unha comisión de traballo a petición da CRUE, xa que se deben incorporar cuestións como o impacto da IA, a docencia en liña, a especialización do coñecemento, etc.
- A elaboración, no futuro, dunha proposta de real decreto de homologacións de titulacións estranxeiras.
Sexenio de transferencia
Igualmente, transmitíusenos que nestes momentos están revisando o texto do documento relativo ao sexenio de transferencia e esperan que sexa de aplicación antes de finalizar 2025.