Toda a información da mesa sectorial do concurso de direccións 2025/26

• Elección da dirección pola comunidade educativa: seguimos defendendo que sexa o Consello Escolar, como máximo órgano de representación da comunidade educativa, quen elixa a dirección do centro.
• Aplicación a todos os centros públicos: a orde debería incluír todos os centros da rede pública, evitando que nos CIFP a dirección continúe sendo designada directamente polos departamentos territoriais, sen participación da comunidade educativa.
• Formación directiva despois do proceso: propoñemos modificar o requisito de ter realizado previamente o curso de función directiva. A LOMLOE (art. 135.6) permite realizalo despois de superar o concurso, o que ampliaría o número de persoas que poden presentarse.
  
  Comprométense a estudialo para o curso que vén.

• Artigo 2.d): deben poder optar á dirección tamén
  • docentes en comisión de servizos noutra comunidade autónoma
  • e docentes que ocupan praza no exterior no seu último ano antes de regresar a Galicia.
• Artigo 3.2: solicitamos que se poida presentar proxecto a un maior número de centros, dada a dificultade actual para cubrir direccións.
• Artigo 3.3: o proxecto de dirección debería poder consultarse durante todo o horario de apertura do centro.
• Artigo 5: a sede de actuación da Comisión de selección debe ser o propio centro educativo, evitando desprazamentos innecesarios ao departamento territorial.
• Artigo 7.5: a cualificación outorgada polos membros da comisión deben emitirse por escrito e de forma secreta, para garantir a independencia das valoracións.
• Artigo 10.2: tamén debe pronunciarse o Claustro sobre a continuidade do director ou directora.
• Artigo 11: cando non sexa posible cubrir a dirección por concurso de méritos, a Administración pode facer nomeamentos extraordinarios, pero propoñemos que se poida abrir a posibilidade de elixir unha nova dirección ao cabo dun curso se aparece unha candidatura voluntaria e a persoa nomeada non desexa continuar. Por outra banda, a Administración debería evitar nomear persoas que conten co rexeitamento dos representantes do centro ou que teñan sancións penais ou disciplinarias relacionadas co centro.
• Cuestión non recollida na orde: é necesario regular o nomeamento accidental doutra persoa nos casos de baixas prolongadas da dirección ou doutros membros do equipo directivo, con recoñecemento económico e administrativo.
• Cuestión non recollida na orde: tamén hai que dar solución ao exercicio do dereito a permisos, licenzas e baixas de curta duración das persoas responsables de centros unitarios.

BAREMO

• Apartado 2.1: consideramos que deben incluírse os servizos prestados como responsables de centros de menos de tres unidades, xa que estas persoas desenvolven na práctica as mesmas funcións que directores e directoras, asumindo ademais o conxunto de coordinacións e dinamizacións do centro.
• Apartado 2.6: solicitamos que tamén puntúen de maneira expresa a coordinación de E-Dixgal, a coordinación de Polos Creativos e a coordinación de Convivencia e Benestar.
• Apartado 2.3: pedimos a retirada deste subapartado, xa que non compartimos que se valore no baremo o desempeño dunha subdirección ou xefatura de servizo en postos da Administración educativa, do mesmo xeito que xa vimos defendendo no Concurso Xeral de Traslados.
• Apartado de méritos académicos: reclamamos que se inclúa de forma específica o Mestrado de Dirección, que xa se imparte desde hai anos nalgunhas universidades, como a UDC, e que debe ser recoñecido como mérito baremable.
• Apartado de cursos de formación: consideramos que tamén deben valorarse os cursos relacionados coa prevención de riscos laborais.