O ámbito dixital é un espazo perigoso, especialmente para mulleres e nenas. Por un espazo inclusivo e cheo de igualdade de oportunidades.
Un estudo sostén que a falta de normativa respecto do uso da intelixencia artificial podería permitir a reprodución de estereotipos de xénero e fomentar a discriminación.
A violencia dixital converteuse nun problema crecente que afecta a sociedade en xeral, pero particularmente ás mulleres e nenas.
O estudo Violencia contra mujeres, niñas, niños y adolescentes en el ámbito digital do Ministerio de Igualdade, promovido e financiado pola Delegación do Goberno contra a Violencia de Xénero, e cuxo obxectivo é analizar as peculiaridades, o impacto e a regulación da violencia dixital exercida sobre mulleres e menores de idade en España, conclúe que:
- O impacto da violencia dixital non é igual para todas as persoas. Mulleres e nenas son quen máis a sofren. Máis do 73 % das mulleres no mundo viviron algún tipo de violencia en Internet e o 90 % das vítimas de difusión de imaxes íntimas sen permiso son mulleres.
- As persoas menores de idade son particularmente vulnerables, sendo susceptibles de ser explotadas por parte de depredadores en liña (ciberacoso –grooming–, sextorsión –sexting– e explotación sexual dixital), debido á súa inmaturidade e a falta de pensamento crítico.
- O acceso doado e temperán á pornografía por parte de menores contribúe a normalizar e manter a violencia estrutural contra as mulleres.
- As vítimas desta violencia dixital sofren consecuencias como vergonza, perda de confianza en si mesmas, ansiedade ou depresión, que poden desembocar en actitudes de autolesión e incluso suicidas. A voz de alarma entre as mozas e mozos aparece en forma de illamento social, trastorno da alimentación ou do sono, pasando por unha diminución do seu rendemento académico. O seu impacto pode ser devastador na saúde mental.
- O desenvolvemento da intelixencia artificial trae novos desafíos. Entre eles están a repetición de prexuízos de xénero e a discriminación.
Os retos asociados con este fenómeno son cada vez máis complexos e requiren unha resposta lexislativa axeitada. A inexistencia dun concepto único e universal de violencia dixital dificulta unha normativa uniforme canto á súa natureza, tipoloxía e características, así como á súa regulación penal.
Por iso, a lexislación en España debe adaptarse para abordar cuestións como o ciberacoso, a protección de datos e o uso de tecnoloxías emerxentes. É esencial establecer políticas que garantan un espazo dixital máis seguro e equitativo para toda a cidadanía e, en especial, para as persoas máis vulnerables.
O acompañamento ás vítimas de violencia de xénero é fundamental para a súa recuperación emocional, social e legal, desde o mundo laboral, social, sanitario… Brindar apoio psicolóxico e orientación xurídica é imprescindible para axudarlles a reconstruír a súa autoestima e autonomía.
Desde o sindicalismo, o acompañamento ás vítimas de violencia de xénero é esencial para garantir espazos laborais seguros, equitativos e libres de discriminación. O asesoramento e protección, promovendo a igualdade de dereitos, a denuncia sen represalias e a construción dunha cultura sindical baseada no respecto e a solidariedade, debe ser a punta de lanza de Comisións Obreiras.
Esiximos que se tomen medidas urxentemente e se traballe para a aprobación e posta en marcha de normativas que dean resposta a unha situación que afecta notablemente e de maneira moi grave a mulleres, nenas e adolescentes.