50 horas
Actualización 31/07/2025: superouse o número de prazas. A inscrición está pechada.
Dar os primeiros pasos como responsable dun Departamento de Orientación (DO) pode xerar tantas ilusións coma incertezas. Este curso está pensado para acompañarte nese camiño e ofrecerche as ferramentas, coñecementos e recursos necesarios para que poidas asumir a xefatura con confianza, criterio e eficacia.
Se acabas de estrearte no cargo ou levas pouco tempo desempeñándoo, atoparás aquí un espazo práctico e colaborativo no que:
- Coñecerás a fondo o papel do Departamento de Orientación nos centros educativos e o marco normativo que o regula en Galicia.
- Descubrirás cales son as funcións específicas da xefatura e como coordinarte con outros cargos do centro.
- Aprenderás a elaborar e organizar a documentación esencial do departamento (PXAD, PAADO, memorias, protocolos…).
- Explorarás estratexias para planificar accións de orientación académica, profesional, psicopedagóxica e de atención á diversidade.
- Reflexionarás sobre boas prácticas, modelos organizativos e ferramentas que che axuden a sistematizar e mellorar o teu traballo diario.
- Potenciarás a túa capacidade para liderar un departamento clave no benestar, inclusión e éxito educativo do alumnado.
Este curso, impartido por Moodle (e cun par de videochamadas por Google Meet) é tamén unha oportunidade para compartires experiencias, resolveres dúbidas reais e formares parte dunha rede de profesionais que, coma ti, están a construír o seu camiño desde o compromiso e a aprendizaxe continua.
- Lugar de celebración: Plataforma de teleformación de CCOO Ensino (Moodle).
- 50 horas.
- Datas de celebración: do 15 de setembro ata o 31 de outubro de 2025.
- Titor: Manuel Martínez Alonso.
- Custo: De balde.
- Prazas: 50.
- Prazo de matrícula: ata completar prazas.
- Solicitada homologación á Consellería de Educación.
Obxectivos
- Coñecer as funcións xerais do departamento de orientación nos centros educativos e do seu responsable.
- Comprender a normativa vixente que regula a organización, funcionamento e actuación dos departamentos de orientación en Galicia.
- Identificar as funcións específicas do xefe ou xefa do departamento de orientación e os seus vínculos coa xefatura de estudos e demais órganos de coordinación docente.
- Saber elaborar, organizar e revisar a documentación básica do departamento: PXAD, Plan de orientación PAADO, memorias, protocolos, informes, etc.
- Establecer pautas para unha planificación eficaz das accións de orientación académica, profesional, psicopedagóxica e de atención á diversidade.
- Recoñecer a importancia do traballo coordinado co equipo docente, as familias e outros servizos e entidades externas.
- Familiarizarse co uso de ferramentas e modelos organizativos que melloren a eficacia e a sistematización do traballo do departamento.
- Reflexionar sobre boas prácticas e estratexias para afrontar os retos habituais na posta en marcha dun departamento de orientación.
Contidos
1. Marco normativo e institucional
- Normativa vixente en Galicia sobre orientación educativa
- Funcións e organización dos departamentos de orientación segundo a lexislación.
- O papel do orientador/a como membro dos órganos de coordinación docente.
2. O xefe/a do departamento de orientación
- Funcións e responsabilidades específicas.
- Relacións e coordinación con outros cargos do centro (dirección, xefatura de estudos, titorías, etc.).
- Participación en comisións e elaboración de informes.
3. Documentación esencial do departamento
- Principais documentos de centro elaborados polo DO: estrutura, contidos e exemplos.
- Memoria de final de curso: seguimento e avaliación.
- Protocolos habituais: acollida, atención á diversidade, absentismo, protección infantil, etc.
- Rexistro de actuacións, informes psicopedagóxicos e modelos de derivación.
4. Planificación e actuacións prioritarias
- Orientación académica e profesional ao longo das etapas educativas de infantil e primaria
- Atención á diversidade e coordinación con equipos específicos (EOE).
- Intervención psicopedagóxica individual e grupal.
- Prevención e detección de dificultades de aprendizaxe e necesidades educativas especiais.
5. Relación coas familias e coordinación externa
- Estratexias para a comunicación fluída e eficaz coas familias.
- Coordinación con servizos sociais, sanitarios e outros axentes externos ao centro.
- Intervención en situacións complexas (absentismo, conflitos, benestar emocional…).
6. Ferramentas e recursos para a xestión
- Modelos e exemplos de documentos para facilitar a organización do traballo.
- Ferramentas para a planificación, seguimento e rexistro.
- Boas prácticas e recursos compartidos entre orientadores/as.
Formulario de inscrición (31/07/2025: pechado)