O sindicato quere conseguir condicións laborais dignas para o sector de infantil 0-3 e insta a patronal e as outras organizacións sociais a que non queden atrás.
Desde CCOO, sindicato maioritario na Mesa Negociadora do Convenio Colectivo de Centros de Asistencia e Educación Infantil, seguimos defendendo e reivindicando o recoñecemento do labor que realizan as traballadoras do sector.
Por iso CCOO, ante a falta de avances reais e sen melloras para unhas condicións laborais dignas, non asinamos o último convenio colectivo do sector.
Todas estas traballadoras que continúan exercendo un traballo esencial para a sociedade non están sendo correspondidas por ese labor: mantéñenselles unhas condicións laborais precarias, tanto en salarios como en xornada e dereitos.
Para o próximo 17 de abril está convocada unha reunión da mesa negociadora, exclusivamente para actualizar o SMI; aínda así, volveremos insistir na nosa firme posición de poñer en valor e recoñecer o traballo que realizan. Desde o sindicato imos pedir, pola vía de urxencia, unha ampliación da orde do día para abordar a insostibilidade da situación salarial das traballadoras do sector.
Desde CCOO reiteramos que o convenio colectivo deixou de man as demandas históricas do colectivo, obviando a súa contribución clave á educación e o coidado da infancia e perpetuando a situación de vulnerabilidade das traballadoras.
Ademais, hai que engadir que a fragmentación do sistema é un problema estrutural no primeiro ciclo de Infantil (0-3), un sistema en que coexisten entre dez e doce modelos de centro distintos, cada un cun convenio e condicións laborais diferentes.
E supón circunstancias distintas, segundo sexa a súa xestión, para unha mesma traballadora:
- No ámbito de centros privados: depende das condicións do convenio estatal, base mínima.
- Escolas de centros de xestión indirecta: tendo o convenio estatal de referencia, están reguladas por licitacións de concellos e/ou de comunidades autónomas.
- Escolas de centros de xestión pública: dependen da regulación das condicións públicas.
Isto provoca:
- desigualdade salarial
- diferenza de ratios e calidade
- dificultade para crear unha rede coherente
CCOO ten realizado constantes accións, mobilizacións, paros e folgas no sector, e segue loitando contra unha situación que relega as traballadoras a cidadás de segunda clase. O noso sindicato, unha vez máis, intentará obter as melloras que corresponden ao labor educativo que realizan e ao recoñecemento profesional que tanto tempo se lles leva negando.