As organizacións sindicais CCOO, UGT e USO, xunto coas organizacións patronais FOESC, AEEISSS, ANESOC e EDUCATIA, asinamos esta mañá o novo IV Convenio Colectivo Marco Estatal de Lecer Educativo e Animación Sociocultural.
O novo texto recolle algunhas das demandas formuladas polas bases de CCOO desde o inicio das negociacións, contribuíndo a mellorar a situación das persoas traballadoras nun sector tan precarizado como este. No acordo podemos destacar as seguintes melloras:
Táboas salariais: desde o 1 de xaneiro de 2024 ata o 31 de decembro de 2027
- Para 2024 e 2025: actualización do SMI para todos aqueles postos de traballo que se atopen por debaixo deste.
- Para as persoas traballadoras que presten servizos en todos aqueles recursos, programas ou servizos de contratación pública cuxo inicio do expediente de contratación se producise con posterioridade á publicación do Convenio, haberá un incremento global arredor do 14 %-18 % repartido entre os anos de vixencia do Convenio. (Monitor/a de Lecer e Tempo Libre e Animador/a Sociocultural +18 %)
- Desde a data de publicación do novo convenio, mentres os recursos, programas ou servizos de contratación pública se atopen en execución, ou non estean sometidos a contratación pública, a suba será dun 1,5 % anual.
- A partir do 1 de outubro de 2027 producirase unha converxencia das diferentes táboas de aplicación cara a unha táboa única que recolle os salarios para todas as persoas traballadoras.
- Para o novo Grupo IV: Persoal de atención directa en servizos de casas de colonias e campamentos que leven aparellada a pernocta das persoas usuarias do servizo, a progresión salarial é diferente debido á mellora no novo complemento de Xornada Especial que, doravante, será de 18 euros diarios ou ben terá unha compensación equivalente en días de descanso retribuído con alta no contrato de traballo.
Clasificación profesional
- Novos postos de traballo enmarcados no Grupo II:
- Titulado/a de grao / Técnico/a de atención especializada en xacementos arqueolóxicos e centros de interpretación patrimonial e museístico asociados a eles.
- Titulado/a de grao en Biblioteca / Técnico/a en xestión / Técnico/a de atención especializada Dinamizador/a de Biblioteca.
- Técnico/a Especialista Auxiliar de biblioteca.
- Novo Grupo na clasificación profesional e novo Anexo para recoller os postos de traballo das persoas traballadoras que exercen a súa actividade en campamentos e casas de colonias, ao tempo que se regulan as funcións e condicións singulares desta actividade, tanto no relativo ás xornadas especiais como ao procedemento de compensación polo exceso de xornada realizada. Este novo Grupo Profesional queda enmarcado no Grupo IV: Persoal de atención directa en servizos de casas de colonias e campamentos que leven aparellada a pernocta das persoas usuarias do servizo. Así mesmo, redúcese á metade a xornada máxima regulada no anterior Convenio para estas actividades, limitándoa a un máximo de 12 horas diarias.
- Novo Anexo que recolle a regulación do rexistro de xornada.
Contratación
Adaptación da contratación á lexislación vixente.
Contrato fixo descontinuo
Regúlase todo o proceso de chamamentos, tanto os medios formais de realización como os mecanismos de procedemento e a orde en que deben efectuarse, debendo darse traslado á Representación Legal das Persoas Traballadoras das previsións de chamamentos, así como das altas que se produzan. Por outra banda, o contrato non poderá ser suspendido durante os períodos vacacionais das persoas traballadoras, nin nos períodos escolares de Semana Santa e Nadal cando a actividade se desenvolva en centros escolares.
Contrato en alternancia
A retribución non poderá ser inferior ao oitenta por cento o primeiro ano nin ao noventa por cento o segundo, respecto da fixada en convenio para o grupo profesional e nivel retributivo correspondente ás funcións desempeñadas, en proporción ao tempo de traballo efectivo. En ningún caso a retribución poderá ser inferior ao salario mínimo interprofesional en proporción ao tempo de traballo efectivo.
Xornada irregular
- A xornada irregular non será de aplicación no ámbito dos comedores escolares.
- A xornada irregular verase limitada nos casos de persoas traballadoras contratadas a tempo parcial que, ao mesmo tempo, estean contratadas noutras empresas ou entidades cando exista incompatibilidade horaria.
- Fixarase, de común acordo, unha data anual para a devolución das horas, cun tempo máximo de 3 meses para efectuar esa devolución.
Descanso semanal
- Eliminación da palabra «preferentemente» na regulación do descanso semanal, determinando que este descanso semanal será de 36 horas ininterrompidas.
Vacacións
- Cando a persoa traballadora preste servizos en diferentes actividades e/ou centros de traballo distintos, dentro da mesma empresa, os períodos vacacionais terán que ser coincidentes nos diferentes calendarios laborais que lle poidan afectar.
Permisos
- Adaptación á lexislación vixente en materia de permisos, incorporando as novas melloras sociais aos mesmos.
- Nova incorporación dunha bolsa de 15 horas retribuídas anuais, proporcionais á xornada de traballo, para asistir a consultas médicas de especialista, tanto da propia persoa traballadora como de fillos/as menores de 14 anos, fillos/as con discapacidade, pais e familiares ao seu cargo en situación de dependencia. Estas horas tamén se poderán empregar para asistencia a reunións de seguimento académico de fillos/as menores de 16 anos. Así mesmo, poderán utilizarse para consultas de atención primaria para aquelas persoas que non dispoñan de persoal sanitario fóra do seu horario laboral. Esta bolsa de horas será proporcional á xornada contratada.
- Unha vez esgotada esta bolsa de horas, a persoa traballadora poderá gozar de permisos non retribuídos para estes mesmos supostos.
- Adaptación á lexislación vixente en materia de suspensión de contrato por nacemento de fillo/a, incorporando as novas melloras sociais aos mesmos.
En materia de protección contra a discriminación das persoas LGTBI
- Introdución de medidas contra a discriminación das persoas LGTBI nos centros de traballo, de conformidade co disposto no Real decreto 1026/2024, polo que se desenvolve o conxunto planificado de medidas para a igualdade e non discriminación das persoas LGTBI na empresa.
- Incorporación dun novo Anexo: Protocolo contra a discriminación e o acoso por razón de orientación sexual, identidade de xénero, expresión de xénero, características sexuais e diversidade familiar. O devandito Anexo foi aprobado na súa totalidade, en toda a extensión da proposta presentada por CCOO.
Desde CCOO valoramos moi positivamente o acordo, que será de aplicación en todo o Estado, xa que supón un paso adiante na mellora das condicións das persoas traballadoras, aínda que somos conscientes de que o sector seguirá precisando novos impulsos no futuro. Este novo convenio servirá de base para o resto das negociacións que teñan lugar en ámbitos inferiores, como o autonómico ou o das empresas.