O sindicato presentou unha batería de propostas na mesa de negociación do persoal docente non universitario celebrada esta mañá entre o Ministerio de Educación e Formación Profesional e as organizacións sindicais representativas do sector. CCOO puxo o foco na obrigación de planificar un inicio de curso no que se garantan as medidas de seguridade e saúde para toda a comunidade educativa. Isto leva consigo non só recursos de protección, senón tamén unha organización distinta e uns criterios claros e consensuados para o ámbito educativo.
Ademais, a Federación de Ensino de CCOO esixiu a incorporación de persoal docente suficiente para poder atender as necesidades educativas derivadas dos meses nos que non se puido impartir educación presencial e poder afrontar o novo curso con reforzos, apoios, desdobres, atendendo as necesidades educativas especiais e de compensación educativa, etc., así como poder seguir as instrucións de seguridade e saúde no que ten que ver coa distancia social.
CCOO tamén expuxo a necesidade de regular o teletraballo no ámbito educativo. O persoal docente está a realizar un gran esforzo para atender ao alumnado e impartir docencia de forma on- line, con imaxinación e dedicación para superar estas dificultades. A organización e funcionamento dos centros educativos está regulada polas Ordes do 94 e os RD 82 e 83 de 1996. Nelas inclúese todo o relacionado coa organización do horario, período lectivo, etc., pero non incorporan nada en relación ao traballo on-line. O Ministerio de Educación, en virtude do art. 149 da Constitución, debe desenvolver normativa sobre como se organiza e que elementos debe ter a regulación dun horario en teletraballo ou un horario mixto.