Un ano máis, Galicia vístese de gala para celebrar o nacemento de Rosalía de Castro, a figura que puxo os alicerces da nosa literatura moderna e que segue a ser o corazón da nosa identidade cultural.
Máis alá de ser a voz da “saudade” e da terra, Rosalía foi unha pioneira na defensa da xustiza social e dos dereitos das mulleres. Con obras como Cantares Gallegos e Follas Novas, non só devolveu o prestixio á nosa lingua, senón que nos ensinou a mirar o mundo con ollos críticos e cheos de humanidade.
Neste 2026, os centros educativos e institucións de todo o país volven encherse de versos, flores e música para que as novas xeracións manteñan vivo o legado desta muller que, dous séculos despois, segue a falarnos de ti a ti.
Protocolo de Lingua Vital
Hoxe, CCOO Ensino reunímonos coa organización de Queremos Galego para confirmar a nosa asistencia ao evento de presentación do Protocolo de Lingua Vital. Este protocolo busca impulsar unha serie de accións colectivas para avanzar na normalización do galego, tanto na sociedade como nas institucións públicas.
O evento de presentación terá lugar na Praza da Quintana de Santiago de Compostela o próximo 14 de marzo ás 12:00.
