No pleno do Consello Escolar do Estado aprobouse o informe deste órgano sobre o sistema educativo e as propostas que se propoñen desde o sindicato, que están relacionadas coa participación de toda a comunidade educativa, a igualdade de oportunidades, a equidade, a inclusión, a mellora da convivencia e benestar de todos e todas, das condicións do persoal dos centros e o incremento de recursos, entre outras.
Na sesión do Consello, celebrado o 12 de decembro, CCOO fixo fincapé na urxencia dun Estatuto Docente que se ocupe, polo menos, das seguintes cuestións:
Diminución da carga lectiva, redución do horario de permanencia e mellora das ratios.Todos os corpos docentes deben ser grupo A1 e subir de nivel. Xubilación anticipada, voluntaria e incentivada para todas e todos. Regulación específica docente da saúde laboral, incluíndo os riscos psicosociais. Mellora real da formación inicial. Formación permanente con recursos e dentro do horario laboral. Unha verdadeira carreira profesional, atractiva, articulada e ben incentivada. Revisión do ingreso e acceso primando aspectos pedagóxicos cunha fase de prácticas con recursos, realmente formativa e ben planificada. Concreción das funcións do profesorado para evitar a acumulación de tarefas e o exceso de burocracia. Mellora e homologación á alza das condicións retributivas e laborais do profesorado, incluíndo tamén licenzas e permisos e acción social.
O sindicato tamén puxo énfase na necesidade de mellorar as ratios, asociándoas, ademais, á diversidade nos grupos (contando dobre a efectos de ratio todo o alumnado con necesidades específicas de apoio educativo); na mellora da atención á diversidade, con incremento de especialistas e atendendo tamén ás dificultades específicas de aprendizaxe; nas condicións para o benestar e a protección da comunidade educativa, con persoal adicional; e na necesidade de máis recursos para a saúde mental.
De igual modo, CCOO incidiu en que a diminución do número de alumnado, froito da caída da taxa de natalidade, non pode ser a xustificación para facer recortes no ensino público. Así mentres os colexios públicos perderon, nos últimos cinco anos, o 7,06% de alumnado e 3.490 aulas, os privados concertados perderon, no mesmo período, o 7,45% do alumnado e apenas 72 aulas. É imprescindible aproveitar a baixada de alumnado como unha oportunidade para mellorar a calidade, a equidade e a inclusividade do noso sistema educativo, e non para facer recortes no ensino público.
CCOO insistiu na necesidade de asegurar e incrementar significativamente o investimento educativo, ata chegar ao 7% do PIB, así como a oferta educativa pública en todas as etapas e ensinanzas.