O secretario xeral da Federación de Enseñanza de CCOO, Francisco García, remitiu esta mañá unha carta á titular do Ministerio de Educación, María del Pilar Alegría, para insistir unha vez máis na necesidade de acometer as negociacións sobre o modelo de acceso á función pública docente, dado o alto índice de interinidade existente na Administración pública.
Co asinamento o pasado 5 de xullo do acordo impulsado por CCOO sobre o plan de choque para reducir a temporalidade nas AA. PP., ábrense grandes desafíos que, entre outros, deben dar solución á temporalidade, un problema endémico na educación pública. Na actualidade, tres de cada dez docentes encóntranse en situación de interinidade. Isto repercute negativamente na calidade educativa e contravén, ademais, o acordado polo Goberno. Así mesmo, o sindicato lémbralle a Alegría que, para cumprir co obxectivo de reducir a temporalidade ao 8 % antes de 2024, requírese a convocatoria de 88 791 prazas de estabilización máis outras 36 898 de reposición.
Esta situación esixe, como así o recoñeceron tanto o Goberno como as representacións dos traballadores e as traballadoras, unha modificación substancial do proceso selectivo, pois o reto de que as Administracións autonómicas poidan, nos próximos meses, aprobar unha oferta de emprego público docente tan numerosa e executala nas seguintes tres convocatorias depende, sen dúbida, de que se dote o modelo de acceso dun concurso-oposición que permita ás persoas aspirantes participar en todas as partes da proba e alegar os seus méritos alcanzados. E, ademais, facelo dunha forma suficientemente áxil para que as CC. AA. poidan xestionar os correspondentes procesos selectivos e se evite na práctica a distorsión que supón deixar todos os anos unha porcentaxe alta de prazas convocadas sen asignación.
Ademais, desde CCOO volvemos recordarlle á ministra que cada ano se presentan aos procesos selectivos máis de 200 000 aspirantes, que seguramente están xa preparándose para afrontar con garantías o próximo concurso-oposición e que, lamentablemente, a día de hoxe non teñen claro como será.