- Despois de rematar o primeiro punto da Orde do día a Consellería de Educación presentou o documento “proposta de criterios para a aplicación da Lei 20/2021, de 28 de decembro, de medidas urxentes para a educación da temporalidade no emprego público”.
CCOO criticou que non se nos facilitase este documento con antelación suficiente para estudalo, así como difundilo entre o profesorado e poder ter en conta as achegas que normalmente fannos chegar e enriquecen a nosa toma de decisións.
A proposta dos criterios para a aplicación da Lei 20/2021 aporta moi poucas novidades xa que a maioría das cuestións xa están claras na Lei. Esta aborda dous procesos de ingreso na función pública:
-
Ingreso por concurso oposición (artigo 2 da Lei 20/2021) mediante un sistema transitorio.
-
Ingreso por concurso de méritos regulado nas disposicións adicionais 6º e 8ª
Con respecto aos procesos de estabilización hai que dicir que en Galicia, e como consecuencia dos acordos estatais asinados por CCOO, UGT e CSIF, xa se convocaron 2.400 prazas (por encima das prazas de reposición) nas ofertas de emprego de 2018, 2019, 2020 e 2021.
Mentres os acordos desas organizacións sindicais permitían ingresar a numerosos opositores na función pública docente, os de sempre, os do non, a CIG, non negociaba nin asinaba ningún acordo, e, polo tanto, non conseguía nada.
Na actualidade ocorre o mesmo. O sistema transitorio mediante concurso-oposición é consecuencia do plan de choque que recolle a Lei 20/21 asinado por CCOO e goza de todas as garantías xurídicas ao abeiro da xurisprudencia.
Por outra banda, o sistema de ingreso por concurso de méritos non está no acordo sindical. É consecuencia dun pacto político no que non interveu ningunha organización sindical nin política galega. Este proceso non ten a seguridade xurídica do concurso oposición, pero está recollido nunha lei e debe cumprirse.
Diversos colectivos xa anunciaron recursos ante os xulgados. Estes anuncios obrigan, se cabe, a ser aínda máis rigorosos na concreción das prazas que se convoquen por este procedemento de forma que non poidan ser cuestionadas xudicialmente.
-
Ingreso por concurso de méritos
En primeiro lugar hai que identificar as prazas definidas na DA 6ª.
Neste caso a propia lei obriga que a praza estivera ocupada ininterrompidamente por persoal interino con anterioridade ao 01/01/2016 e que sexa estrutural. O único que hai que clarificar é que praza cumpre o requisito de ser estrutural.
É un debate ficticio, por non dicir un engano, afirmar que unha praza cuberta por un funcionario de carreira en expectativa ou en prácticas dende o ano 2016, o é de forma temporal.
A lei 20/2021 establece con claridade que se refire a “prazas vacantes de natureza estrutural ocupadas de forma temporal por persoal cunha relación desta natureza”; os funcionarios en prácticas e de carreira non teñen unha relación de natureza temporal coa administración.
Con respecto ás prazas definidas na DA 8ª xa sabiamos pola Lei 20/2021 que se refería ás prazas estruturais ocupadas na actualidade por persoal interino que viñera prestando servizos en calquera praza de forma ininterrompida con anterioridade ao 01/01/2016 e que non fora contabilizada para ofertar por concurso de méritos pola DA 6ª xa que non cabe duplicar as prazas.
-
Ingreso por concurso oposición
A Lei 20/2021 xa deixaba claro que as prazas deste proceso debían estar ocupadas de forma ininterrompida con anterioridade ao 01/01/2018 e ser estruturais. Co que CCOO non estamos de acordo e que estas prazas deban estar ocupadas a 30/09/2021 xa que a Lei no seu artigo 2.1 establece que “estiveran ocupadas de forma temporal e ininterrompidamente polo menos nos 3 anos anteriores a 31 de decembro de 2020”. Se tomamos como referencia o 31 de decembro de 2020 a oferta de prazas é bastante maior.
Demandamos un cambio de criterio temporal para que a oferta sexa maior beneficiando así ao persoal interino con menos servizos que non van ter opción a praza no concurso de méritos fronte aos interinos con máis servizos.
-
Novidades do documento
-
O documento establece que non se consideran estruturais as prazas de xornada reducida e as derivadas das reducións de xornada do persoal que desempeña cargos directivos en determinados centros. CCOO non comparte esta restrición e demandamos á Consellería que compute estas prazas..
-
Apróbanse no Decreto da OPE as prazas das especialidades do extinto corpo de PTFP nos novos corpos (PES e profesores especialistas de sectores singulares de FP) á espera de que se determine a titulación de ingreso en cuxo caso serían convocadas. CCOO valora positivamente esta decisión.
-
Non haberá promoción interna. CCOO rexeita que non se facilite a promoción interna por concurso de méritos.
-
Haberá quenda para persoas con discapacidade. CCOO comparte esta decisión.
-
Non obrigatoriedade de presentarse ao concurso de méritos. Compartido por CCOO.
-
Demandas concretas de CCOO no proceso de negociación
A Consellería estableceu a seguinte orde de prelación:
-
Definición das prazas da DA 6ª
-
Definición das prazas da DA 8ª
-
Definición das prazas de concurso oposición do artigo 2 Lei 20/2021.
-
Identificación das prazas vacantes que teñen titular para restar ás anteriores.
Desde CCOO demandamos unha negociación transparente nunha comisión técnica ou Mesa Sectorial.
Esiximos á Consellería que nos facilite o listado de prazas vacantes a ofertar por cada un dos anteriores apartados con datos suficientes para coñecer a trazabilidade de cada unha delas e poder discutilas unha a unha.
Da mesma forma demandamos os datos das prazas que teñen titular e que deben ser excluídas do proceso selectivo.
Urxe avanzar esta negociación xa que vai ser un proceso longo. Como en todo proceso selectivo, en Galicia o requisito do idioma galego é obrigatorio e nunca estivo cuestionado. Asemade, o número de aspirantes que o cumpren será menor que noutros territorios. A Consellería confirmou que será un requisito como en todos os procesos selectivos anteriores.