Desde CCOO-USC queremos trasladar ao conxunto do persoal a nosa satisfacción pola sinatura do novo acordo de xubilación parcial anticipada con contrato relevo para o PTXAS laboral fixo da Universidade de Santiago de Compostela, un acordo que permite recuperar unha modalidade de xubilación amplamente demandada polo persoal e que quedara interrompida tras os cambios normativos introducidos a finais de 2024.
Este acordo é o resultado dun proceso de negociación desenvolvido entre a Universidade e a representación sindical no Comité Intercentros, no que CCOO participou activamente desde o primeiro momento, defendendo a necesidade de establecer un marco que fixese compatible a nova normativa estatal coa continuidade dun dereito fundamental para o persoal laboral da USC.
O propio texto do acordo recoñece que a súa negociación responde á demanda formulada pola representación dos traballadores tras a aprobación do Real decreto-lei 19/2026, norma que abriu a porta a recuperar esta modalidade de xubilación nas administracións públicas.
Unha vez máis, o papel activo de CCOO —negociando, impulsando e achegando propostas— resultou fundamental para a recuperación deste dereito á xubilación parcial que quedara en suspenso en abril de 2025. Con este paso, novas persoas do noso cadro de persoal poderanse sumar aos varios centos que xa se beneficiaron del desde que, tamén por impulso de CC.OO., se asinou o primeiro acordo hai máis dunha década. Sen ese traballo continuado ao longo destes anos, este dereito non existiría hoxe na USC.
Para CCOO, a recuperación da xubilación parcial anticipada constitúe unha medida de gran relevancia social e laboral porque permite unha transición progresiva cara á xubilación, favorece a conciliación da vida laboral e persoal nas etapas finais da vida profesional e contribúe ao relevo xeracional e á incorporación de novo persoal á Universidade. Ademais, o texto acordado recolle expresamente que a súa aplicación non suporá a redución de prazas estruturais da USC, unha garantía que consideramos esencial para preservar o emprego público e a calidade dos servizos universitarios.
Consulta aquí o texto íntegro do acordo asinado.
Principais aspectos do acordo
O Plan será de aplicación ao persoal laboral fixo da USC con xornada a tempo completo incluído no ámbito do convenio colectivo do persoal laboral.
Para acceder á xubilación parcial anticipada será necesario:
- Estar, como máximo, a tres anos da idade ordinaria de xubilación.
- Acreditar, con carácter xeral, un mínimo de 33 anos de cotización efectiva (ou 25 anos no caso de persoas cun grao de discapacidade igual ou superior ao 33 %).
- Ter unha antigüidade mínima de seis anos na USC inmediatamente anteriores á xubilación parcial.
O acordo establece unha redución xeral da xornada do 75 %, aínda que, no suposto de acceso con máis de dous anos de anticipación respecto da idade ordinaria de xubilación, a redución durante o primeiro ano será do 33 %.
Tamén se contempla a posibilidade de acumular o tempo de traballo en determinados períodos ou mesmo ao inicio da situación de xubilación parcial, unha medida que achega flexibilidade tanto para o persoal como para a organización dos servizos.
Outro aspecto especialmente importante é que o persoal que acceda á xubilación parcial manterá o dereito a percibir o premio extraordinario de xubilación nas mesmas condicións que o resto do persoal, segundo o previsto nos acordos vixentes.
Un acordo con estabilidade e garantías
O texto establece mecanismos específicos para a vinculación dos contratos de relevo, regula os procedementos de solicitude e crea unha Comisión de Seguimento —integrada pola Xerencia e polas organizacións sindicais asinantes— para supervisar a aplicación do acordo e resolver as incidencias que poidan producirse.
Ademais, o acordo terá vixencia ata o 31 de decembro de 2030 e poderá prorrogarse por anos sucesivos mediante acordo expreso das partes.
O compromiso de CCOO-USC
CCOO-USC participou na negociación e impulsou activamente a procura dunha solución que permitise recuperar este dereito para o PTXAS laboral nun contexto normativo especialmente complexo. Consideramos que o acordo acadado ofrece seguridade xurídica, garante o mantemento do emprego estrutural e facilita unha renovación ordenada do persoal da Universidade.
A defensa da xubilación parcial foi e seguirá sendo unha prioridade para CCOO, porque contribúe a mellorar as condicións laborais do persoal, favorece o relevo xeracional e reforza o futuro dos servizos públicos universitarios.
Valoramos moi positivamente este acordo, que permitirá que moitas persoas da USC poidan acceder á xubilación parcial e facilitará a incorporación de novo persoal aos servizos públicos. Non obstante, seguimos reclamando que este dereito sexa tamén plenamente recoñecido para o persoal funcionario, cuestión que continúa pendente de desenvolvemento normativo.
CCOO-USC continuará defendendo os dereitos das persoas traballadoras e impulsando novas medidas que contribúan a mellorar as condicións de traballo e a calidade dos servizos públicos universitarios.
Sección sindical de CCOO, o poder de cambiar as cousas
Para máis información sobre este tema, así como para achegar consultas ou suxestións sobre este e outros asuntos, podes pasarte polo noso local sindical na Casa dos Catedráticos (Campus Vida) en horario de 8:00 a 15:00 h, ou en Lugo, os luns e martes, no local sindical da planta inferior do Edificio Intercentros. Tamén podes contactar con CC.OO. a través do correo electrónico e dos teléfonos que se indican ao pé.
Máis información:
