CCOO-ENSINO rexeita a proposta de nova zonificación escolar para Vigo e concentrarase o vindeiro mércores 17 de xaneiro diante da Xefatura Territorial de Pontevedra

As persoas delegadas da Xunta de Persoal Docente de Pontevedra concentráronse diante de Xefatura Territorial este mércores após o plenario no que se aprobou unha resolución conxunta de rexeitamento á proposta da Xunta.

CCOO-Ensino vén participando nos diferentes actos de rexeitamento á protesta. Alén das concentracións de delegados/as, participamos na presentación dun manifesto conxunto de rexeitamento á proposta inxusta, problemática e desequilibradora que reduce a catro as zonas escolares e apoiamos a concentración que as asociacións de nais e pais convocaron para o venres 19 de xaneiro na Farola de Urzáiz.

CCOO-Ensino censura as formas unilaterais e dogmáticas da Consellaría, que presenta unha proposta sen que tivera cabida a mínima negociación nin coas familias nin co profesorado nin cos sindicatos. O suposto Grupo de Traballo que a Consellaría di ter constituído non é máis que unha comisión onde a Consellaría pretende que os directores e directoras referenden a súa proposta para darlle un verniz participativo.

Por outra banda, a proposta da Xunta racha co principio de equilibrio entre as distintas zonas da cidade, pois impide que as familias que matriculen os seus fillos noutras zonas teñan servizo de transporte, unha estratexia coa que, para CCOO-Ensino, se pretende illar os barrios periféricos de Vigo e beneficiar os máis céntricos, onde hai unha forte presenza do ensino concertado. Alén diso, as novas zonas escolares son desiguais e non respectan os principios de equilibrio centro-periferia ou proximidade. Así, a adscrición proposta para algúns centros non é realista nin xusta, como demostra o feito de desviar o alumnado de Navia ao IES de Valadares, localizado a 10 quilómetros, no canto de envialo aos centros próximos ao barrio.

Finalmente, CCOO-Ensino insta a Consellaría a retirar de xeito inmediato a proposta e abrir un proceso de negociación para acadar un modelo que remate cos problemas da cidade en troques de crear outros novos e que garanta a posta en valor do ensino público e a calidade educativa, o que pasa por unha zonificación realista, sensata e avalada por un proceso previo de negociación con toda a comunidade educativa.


 

Comparte o que pensas