Acordo para a mellora do emprego público

– Para calquera dúbida podes contactar con nós nos locais sindicais, así como no enderezo electrónico: ensino@galicia.ccoo.es

 

1. Que é acordo para a Mellora do Emprego Público asinado o 29 de Marzo entre CCOO, UGT e CSIF co goberno de España?

É un acordo que incorpora as seguintes melloras:

  1. Ofertas de emprego público superiores ao 100% da taxa de reposición.
  2. Medidas para reducir a taxa de temporalidade.
  3. Converter en fixas o 90% das prazas que hoxe ocupa persoal interino.
  4. Oferta das prazas estruturais ocupadas de forma temporal dende hai tres anos.
  5. Valoración do tempo de servizos na administración como mérito para o acceso ao Corpo.

2. Restrinxe este acordo a suba salarial das empregadas e empregados públicos?

NON. Este acordo non contempla ningunha medida en materia de retribucións, que son fixadas nos Orzamentos Xerais do Estado.

3. Supón o Acordo un “ERE masivo” para o colectivo de interinas e interinos?

NON. O Acordo non limita o número de anos que se pode traballar en situación de temporalidade, pese a que algunhas Organizacións Sindicais así o manifestan. 

4. Limita este acordo a estabilidade nas listas de contratación?

NON. As listas de contratación non son obxecto deste acordo. En Galicia, o acordo de 20 de Xuño de 1995, que foi asinado por CCOO, consolida a estabilidade nas listas de contratación en función da antigüidade no acceso ás mesmas.

5. Por que o acordo non suscitou unidade sindical?

Desafortunadamente a unidade sindical non foi posible. Asinamos o acordo porque supón unha mellora da estabilidade do persoal que traballa para a administración pero outras organizacións sindicais preferiron antepoñer os seus intereses particulares aos xerais.

6. Por que outras organizacións sindicais demonizan o acordo?

En CCOO debémonos á mellora das condicións laborais dos traballadores/as, o que pasa por negociar, pactar e ás veces asumir posicións mellorables. Outras organizacións entenden a negociación como un xogo de “todo ou nada”: esixen posturas maximalistas que nunca serán asumidas pola Administración. Antepoñen os seus intereses particulares á mellora das condiciones laborais do conxunto dos traballadores é traballadoras, quedando fóra dos acordos para logo desprestixiar aos sindicatos que nos esforzamos en acadar melloras e avances significativos.