A situación das persoas traballadoras do ensino concertado en Galicia, comparada coa dos compañeiros e compañeiras do resto do Estado, é inaceptable. Non podemos seguir impasibles e indiferentes vendo como no resto das comunidades se progresa en xubilación parcial, acordos de mantemento de emprego, paga de antigüidade, sexenios, equiparación salarial, redución da xornada lectiva, pagamento de coordinacións e xefaturas de departamento, incremento de partidas orzamentarias en módulos, redución progresiva da xornada lectiva a maiores de 54 anos… Mentres, en Galicia retrocedemos en dereitos, lexíslase expresamente contra os traballadores e traballadoras do ensino concertado e ignóranse as chamadas á negociación e a reposición dos dereitos suprimidos.

Esta situación xa vén de vello e non é produto de crises económicas nin da baixada da natalidade; é consecuencia de decisións políticas e da indiferenza da maioría sindical que consente esta situación e renuncia a liderar a defensa das persoas traballadoras. CCOO non contamos coa maioría sindical que si teñen outras organizacións e a nosa representatividade na concertada non é suficiente para convocar as mobilizacións que hai anos vimos reclamando. Pero seguimos insistindo na necesidade de mobilizar o sector para mudar a dinámica e frear a hemorraxia de perda de dereitos.

Vivimos nunha situación enquistada: os que teñen o poder político para resolver a situación néganse a facelo; e os que teñen o poder sindical para desbloqueala resístense a exercelo… e levamos así máis de doce anos.

Agora a situación volveuse crítica. Se non lle pomos remedio, este curso e os vindeiros asistiremos a un rosario de peches de unidades e perda de postos de traballo, e perderase, unha vez máis, a oportunidade de mellorar a calidade do ensino e das condicións laborais.

Na Mesa Tripartita do Ensino Concertado do día 16 de decembro de 2022, o director xeral de Centros e RRHH comprometeuse a darnos unha resposta no primeiro trimestre de 2023. Se esa resposta non chega ou non é satisfactoria, CCOO consideramos imprescindible convocar mobilizacións e paros no sector; CCOO faremos o imposible para que, de producirse ese escenario, se sumen todas as organizacións sindicais. Se a organización maioritaria se inhibe unha vez máis, CCOO estamos dispostos a convocar as mobilizacións xunto con aqueloutras organizacións sindicais que compartan as mesmas reivindicacións.

Ás patronais pedímoslles que mostren agora o mesmo celo e compromiso que demostraron coas mobilizacións contra a LOMLOE e faciliten e animen a participar aos seus traballadores e traballadoras, do mesmo xeito que o fixeron na concentración que convocaron en xuño de 2022 para acadar unha reunión coa Consellería que xa estaba acordada e concedida.

Se a Consellería de Educación non cumpre os compromisos, mobilizacións xa